Додгоҳи олии Тоҷикистон ӯро, ки ду фарзанди хурдсол дорад, рӯзи 5-уми феврал ҳашт сол аз озодӣ маҳрум намуд. Пештар додситон барояш 17 сол зиндон хоста буд. Худаш иттиҳоми “хиёнат ба давлат”-ро напазируфтааст.
Сийнат Султоналиева, пажӯҳишгари Human Rights Watch дар масоили Осиёи Марказӣ, рӯзи 5-уми феврал ба Радиои Озодӣ гуфт: “Мутаассифона, дар Тоҷикистон муддатҳои дароз аст, ки хабарнигорон, блогерҳо ва ҳомиёни ҳуқуқ барои баёни андешаи интиқодӣ таъқиб мешаванд. Рухшона журналисти нуҳум аст, ки ба муҳлати тӯлонӣ маҳкум шудааст.”
Ҳашт нафари дигар – Улфатхоним Мамадшоева, Абдулло Ғурбатӣ, Далери Имомалӣ, Завқибеки Саидаминӣ, Хушрӯз Ҷумъаев (Хушом Ғулом), Абдусаттор Пирмуҳаммадзода, Хуршед Фозилов ва Аҳмади Иброҳим мебошанд.
Сийнат Султоналиева
“Парвандаҳои аксари онҳо паси дарҳои баста ва таҳти мӯҳри махфӣ баррасӣ шудаанд. Аз ин рӯ , мешавад гуфт, ки бо чунин муносибат ба парвандаҳо ба муҳокимаҳои одилонаи додгоҳӣ аслан умедвор буда намешавад”, -- гуфт Султоналиева.
Ин намояндаи Human Rights Watch аз мақомоти Тоҷикистон хост, ба озодии баён эҳтиром гузошта, даст аз таъқиби журналистон бардоранд.
“Ҳамаи журналистони маҳкумшударо озод карда, барояшон бозбинии одилонаи парвандаро фароҳам биоранд. Ҳатто агар мақомот дар Тоҷикистон ба гунаҳкор будани онҳо далели боварбахш дошта бошанд,” – хулоса кард ӯ.